Amakipe y’Umurenge wa Murambi akina umukino w’Umupira w’amaguru haba mu bagabo n’abagore ndetse  na Ngarama mu bagabo niyo yahagarariye Akarere ka Gatsibo mu marushanwa y’Umurenge Kagame cup 2024/2025 ku rwego rw’Intara y’Iburasirazuba.

Aya marushanwa afite insanganyamatsiko igira iti;’’ Twitabire imikino, twimakaza imiyoborere myiza n’umuco wo guhiga no kurushanwa’’.

Ku ikubitiro, ikipe y’Umurenge wa Murambi mu bagabo ihagarariye Akarere ka Gatsibo yakinnye n’iy’Umurenge wa Jarama ihagarariye Akarere ka Ngoma itsinda ibitego 2-1 cya Jarama, naho mu bagore, ikipe y’Umurenge wa Murambi yatsinzwe n’Umurenge wa Gahara mu Karere ka Kirehe ibitego 3-0.

Kuri uyu wa Kabiri taliki ya 4 Werurwe 2025, nibwo ikipe y’Umurenge wa Ngarama yakinnye n’iy’Umurenge wa Kirehe umukino usoza ikipe y’Umurenge wa Kirehe itsinze Ngarama ibitego 2-0.

Kugeza ubu, amakipe 2 mu bagabo ni 1 mu bagore yaserukiye Akarere ka Gatsibo ku rwego rw’Intara y’Iburasirazuba, ikipe y’Umurenge wa Murambi niyo yageze muri ½ cy’irushanwa.

Umunyamabanga Nshingwabikorwa w’Intara y’Iburasirazuba Dr Jeanne Nyirahabimana yibukije abitabiriye aya marushanwa ko yateguwe mu rwego rwo kurushaho kwimakaza imiyoborere myiza dukesha Nyakubahwa Perezida wa Repubulika Paul Kagame haba mu bukungu, imibereho myiza ndetse n’imiyoborere myiza.

Aya marushanwa yishimirwa n’abaturage mu byiciro bitandukanye birimo abakuze, urubyiruko ndetse n’abana bato.