Abayobozi n’abakozi b’Ikigo cy’Igihugu gishinzwe iterambere ry’inzego z’ibanze(LODA) basuye urwibutso rwa Jenoside yakorewe Abatutsi rwa Kiziguro bagamije kunamira inzirakarengane zihashyinguye mu cyubahiro; ndetse babwiwe amateka y’itegurwa n’ishyirwa mu bikorwa rya Jenoside yakorewe Abatutsi mu cyahoze ari Komine Murambi yahujwe n’andi Makomine akabyara Akarere ka Gatsibo.

Iki gikorwa cyabaye ku wa Kane taliki ya 12 Kamena 2025 cyitabirwa n’abayobozi bakuru n’abakozi b’ikigo cya LODA bagera ku 130.

Umuyobozi Mukuru w’Ikigo cy’Igihugu gishinzwe iterambere ry’inzego z’ibanze(LODA), Nyinawagaga Claudine yavuze ko baje gusura urwibutso rwa Kiziguro nk’ahantu habereye Jenoside ikomeye hakicwa abatutsi benshi bazira uko bavutse, ati: ‘’ Jenoside yakorewe Abatutsi yateguwe ndetse ishyirwa mu bikorwa n’abayobozi bahoze bayobora uRwanda, urugero ni Gatete Jean Baptiste wayoboraga Komine Murambi wagize uruhare rukomeye mu kwica Abatutsi’’.

Abakozi ba LODA bishyuriye imiryango igera kuri 220 yarokotse Jenoside yakorewe A batutsi itishoboye amafaranga y’uRwanda agera kuri miriyoni eshatu n’ibihumbi magarana atatu (3,300,000 Fw).

Ku ruhande rw’Akarere ka Gatsibo, iki gikorwa cyitabiriwe n’Umuyobozi w’Akarere wungirije ushinzwe imibereho y’abaturage ariko na Perezida wa Ibuka mu Karere ka Gatsibo.