Kuri uyu wa Mbere taliki ya 9 Gashyantare 2026, Umuyobozi w’Akarere ka Gatsibo Gasana Richard arikumwe n’inzego z’Umutekano yayoboye inama y’umutekano yaguye y’Akarere igamije gufata ingamba zikomeza gushyira umuturage ku isonga.

Iyi nama yitabiriwe n’abagize Komite Nyobozi y’Akarere, inama y’Umutekano itaguye y’Akarere, abanyamabanga Nshingwabikorwa b’Imirenge, Utugari n’abagize urwego rwunganira Akarere mu mutekano rwa DASSO.

Mu butumwa bwahawe abayobozi batandukanye bitabiriye iyi nama, Umuyobozi w’Akarere yasabye inzego zitandukanye z’ubuyobozi gukomeza ingamba zo kurwanya no gukumira inzoga z’inkorano zitujuje ubuziranenge zishobora kugira ingaruka mbi ku buzima bw’abaturage.

Abayobozi b’inzego z’ibanze barimo: Abanyamabanga Nshingwabikorwa b’Imirenge, utugari n’abagize urwego rwunganira Akarere mu mutekano rwa DASSO basabwe gukomeza kwegera abaturage babakangurira kurushaho kunoza isuku n’isukura, gukemura ibibazo bibangamiye imibereho myiza y’abaturage no gahunda ya girinka byose bifasha umuturage kujya ku isonga.