Abaturage bo mu Mirenge igize Akarere ka Gatsibo barakangurirwa kwitegura neza igihembwe cy’Ihinga cya 2026A bategura imirima ku gihe ndetse no kwiyandikisha muri smart nkunganire.

Ni ubutumwa bwatanzwe kuri uyu wa Kabiri taliki ya 26 Kanama 2026 n’Umuyobozi w’Akarere wungirije ushinzwe imibereho myiza y’abaturage Mukamana Marceline ubwo yifatanyaga n’abaturage b’Akagari ka Bukomane mu Murenge wa Gitoki.

Mu mwaka ushize w’ingengo y’imari wa 2024/2025, mu Karere ka Gatsibo hahinzwe ibihingwa bitandukanye birimo: Ibigori, ibishyimbo, umuceri, urutoki na Soya.

Ibi bihingwa byiganje mu makoperative y’ubuhinzi cyangwa abahinzi ku giti cyabo, ibi bihingwa bikunze guhingwa ku butaka buhuje hirya no hino mu Karere.

Mu musaruro wabonetse mu gihembwe cy’ihinga gishize, impuzandengo ku bigori yari toni 4.8 kuri hegitari, ibishyimbo yari toni 1.2 kuri hegitari, umuceri toni 5.8 ndetse hari abahinzi basaruye toni 7 z’umuceri kuri hegitari, urutoki  ni toni 23 kuri hegitari  na 1 ya soya kuri hegitari.