Kuri uyu wa Kabiri taliki ya 9 Nzeri 2025, hirya no hino mu Karere ka GATSIBO hatangijwe ibikorwa by’icyumweru cyahariwe ihame ry’uburinganire, ku rwego rw’Akarere byatangirijwe mu Kagari ka Nyabicwamba mu Murenge wa Gatsibo.

Muri iyi gahunda y’icyumweru cyahariwe ibikorwa by’ihame ry’uburinganire, hazakorwa ibikorwa bitandukanye birimo: Kwandika abana mu bitabo by’irangamimerere, kwandika no gusezeranya imiryango ibana itarasezeranye, gukemura amakimbirane yo mu miryango no kwigisha abaturage amategeko ajyanye n’Umuryango.

Umunyamabanga Nshingwabikorwa w’Intara y’Iburasirazuba Dr Jeanne Nyirahabimana wari umushyitsi mukuru muri iki gikorwa, yakanguriye abaturage b’Akagari ka Nyabicwamba mu Murenge wa Gatsibo kuzitabira ibikorwa byose byagenwe muri iki cyumweru cyahariwe ibikorwa by’ihame ry’uburinganire.

Iki gikorwa cyitabiriwe n’inzego z’Ubuyobozi, abafatanyabikorwa batandukanye, inzego z’Umutekano ndetse n’abaturage.

Biteganyijwe ko, ibikorwa by’icyumweru cyahariwe ihame ry’uburinganire bizakorwa kuva taliki ya 9-19 Nzeri 2025, ku nsanganyamatsiko igira iti: ‘’Ihame ry’Uburinganire, inkingi y’imiyoborere myiza n’iterambere ridaheza kandi rirambye’’.