Abaturage b’Akarere ka Gatsibo barakangurirwa kwitabira gahunda yo kwiyandikisha muri sisiteme imibereho yasimbuye ibyiciro by’ubudeke byakoreshwaga n’abaturage kugirango babone serivise zimwe na zimwe bakenera.

Ni ubutumwa bwahawe abaturage wa Kabiri taliki ya 2 Nzeri 2025 ubwo hakorwaga inteko z’abaturage mu tugari 69 tugize Akarere ka Gatsibo, ku rwego rw’Akarere zabereye mu Kagari ka Nyabisindu mu Murenge wa Kiramuruzi.

Umuyobozi w’Akarere wungirije ushinzwe iterambere ry’ubukungu Sekanyange Jean Leonard yasabye abaturage kureba ko biyandikishije muri sisiteme imibereho bakanga *195# bagakurikiza amabwiriza, abasanze batariyandikisha basabwe kugana ubuyobozi bw’Akagari kugirango biyandikishe.

Nyirakamana Zawadi, Umukozi w’ikigo cy’Igihugu gishinzwe iterambere ry’inzego z’ibanze yabwiye abaturage b’Akagari ka Nyabisindu mu Murenge wa Kiramuruzi ko ‘’Sisiteme imibereho ifasha abaturage kwishyura ubwisungane mu kwivuza ndetse igafasha n’Igihugu gukora igenamigambi''.