Ubwisungane mu kwivuza ni umwimerere Nyarwanda bufasha abaturage kubona serivise z’ubuvuzi ku giciro gito mu mavuriro ya Leta mu Gihugu hose.

Buri mwaka, Akarere ka Gatsibo gahiga umuhigo wo gukangurira abaturage kwiyishyurira umusanzu w’ubwisungane mu kwivuza kugirango bakomeze kubona serivise z’ubuvuzi hagamijwe kugira ubuzima bwiza.

Muri uyu mwaka w’ingengo y’imari wa 2025/2026, Akarere ka Gatsibo kamaze kugera ku ijanisha rya 75.81% by’abaturage bamaze kwishyura umusanzu w’ubwisungane mu kwivuza. Abaturage bamaze kwishyura umusanzu wose w’ubwisungane mu kwivuza bagera ku ijanisha rya 67.68% naho 8.12% bishyuye ibice.

Mu ibarura rusange ry’abaturage rya 2022, hagaragajwe ko Akarere ka Gatsibo batuwe n’abaturage bagera ku 551,164 barimo abagabo 264,461 n’abagore 286,703 batuye ku boso bwa kilometer kare (435KM²).

Kugeza ubu, abaturage bagera ku bihumbi 506,147 nibo bagomba gutanga ubwisungane mu kwivuza muri uyu mwaka w’ingengo y’imari ya 2025/2026.

Umwaka ushije w’ingengo y’imari wa 2024/2025, Akarere ka Gatsibo kasoje umwaka kari ku ijanisha rya 86.17% mu kwishyura ubwisungane mu kwivuza.