Itsinda ry’Abasenateri rigizwe na Senateri Gasana Alfred na Senateri Uwimbabazi Peninah bari mu ruzinduko rw’iminsi ibiri mu Karere ka Gatsibo rugamije kureba iterambere ry’ubworozi hibandwa ku biribwa by’amatungo.

Ku munsi wa mbere, Abasenateri basuye umworozi w’inka ntangarugero wo mu Murenge wa Rwimbogo mu rwego rwo kureba uko aba borozi bakora ibi bikorwa, imbogamizi bahura nazo ndetse no gufata ingamba zigamije kurushaho guteza imbere ubworozi.

Munyaburanga Emmanuel, ni umworozi ntangarugero wororera mu Murenge wa Rwimbogo wororera mu biraro bya kijyambere byatumye ubworozi bwe burushaho gutera imbere ndetse no kuzamura umukamo.

Ikindi gikorwa cyasuwe n’abasenateri ni uruganda rutunganya ibiryo by’amatungo rwubatswe mu Kagari ka Nyabicwamba mu Murenge wa Gatsibo hagamijwe kureba icyo uru ruganda rufasha aborozi kubona ibiryo by’amatungo, nyuma basura abaturage bo mu Murenge wa Kageyo baganira n’abaturage.

Ubwo basozaga uruzinduko rw’Akazi bagiriraga mu Karere ka Gatsibo, Abasenateri barikumwe n’Umuyobozi w’Akarere wungirije ushinzwe iterambere ry’ubukungu bakoranye inama n’aborozi n’aborozi bahagarariye abandi, abahagarariye inganda zikora ibiryo by’amatungo n’abakozi bashinzwe ubworozi ku rwego rw’Akarere n’imirenge.

Abaturage bo mu Karere ka Gatsibo bagera kuri 53.7% b’amatungo maremare n’amagufi, hari aborozi bororera mu nzuri 668 n’abandi bakorera mu biraro.

Kugeza ubu, mu Karere ka Gatsibo hari inka zigera ku bihumbi 71,483 zirimo inyarwanda zigera ku 20,988, inka za Kijyambere ni 2,181 n’inka zivanze zigera 48,314. Kuva muri 2006, gahunda ya Girinka yatangira mu Rwanda, mu Karere ka Gatsibo imiryango igera 24,574 imaze korozwa inka.