Itsinda ry’abanyeshuri biga mu ishuri rya Gisirikari rya Nyakinama Command and Staff College basuye Akarere ka Gatsibo berekwa uko ubuhinzi n’ubworozi mu Karere byateje imbere abaturage.

Ni ubutumwa byatanzwe n’Umuyobozi w’Akarere ka Gatsibo Gasana Richard ubwo yagaragazaga ishusho y’Akarere ku banyeshuri bari mu rugensoshuri mu Karere ka Gatsibo bagamije kureba uko ibikorwa by’Ubuhinzi n’Ubworozi bizamura iterambere ry’abaturage.

Hagarajwe ko mu Karere ka Gatsibo hari ibishanga 3 bihingwamo umuceri birimo; Coproriz Ntende ihinga ku buso bwa hegitari 600 z’Umuceri mu Mirenge ya Rugarama , Gitoki na Rwimbogo, igishanga cya Kanyonyomba kuri hegitari 330 ziri mu Murenge wa Kiramuruzi, Kiziguro na Murambi n’Igishanga cya Rwangingo gihingwaho umuceri kuri hegitari 250 ziri mu Mirenge ya Ngarama na Gatsibo. 

Aba banyeshuri, bagaragarijwe ko mu Karere ka Gatsibo hari amakoperative agera kuri 65 akora ibikorwa bitandukanye by’ubuhinzi birimo umuceri, imyumbati, ibigori, imbuto, ibishyimbo na kawa. Hari amakoperative agera kuri 31 akora ibikorwa by’ubworozi birimo; ubworozi bw’inka, ihene n’inzuki.

Mu Karere ka Gatsibo habarurwa inka ibihumbi 71 ,483 zorowe n’aborozi 668 bororera ku buso bwa hegitari 7,075. Binyuze mu bukangurambaga bwakorewe aborozi , bakanguriwe gukoresha neza inzuri hahingwa kuri 70% na 30% z’ubutaka zikorerwaho ubworozi bwo mu biraro.

Nyuma yo kugaragarizwa ishusho y’ubuhinzi n’ubworozi mu Karere ka Gatsibo, abanyeshuri biga mu ishuri rya Gisirikari rya Nyakinama Command and staff college, basuye ikigo gitubura imbuto y’ibigori na soya cya Gabiro Agro processing industry giherereye mu Kagari ka Simbwa mu Murenge wa Kabarore.