Hirya no hino mu Mirenge 14 igize Akarere ka Gatsibo abana n’urubyiruko bakomeje kwitabira gahunda y’Intore mu biruhuko, bagahabwa ubutumwa buzakomeza kubafasha mu rugendo rw’iterambere no kubashyigikira ku hazaza habo.

Gahunda y’Intore mu biruhuko yatangiye taliki ya 23 Nyakanga ikazasozwa taliki ya 29 Kanama 2025. Biteganyijwe ko gahunda y’Intore mu biruhuko yitabiriwe n’urubyiruko rugera ku bihumbi 52,450 batorezwa kuri sites 65 zirimo 14 z’icyitegererezo ku rwego rw’Umurenge zizatorezwaho urubyiruko 12,491.

Ubwo yasuraga intore mu biruhuko kuri site ya GS Bushyanguhe mu Kagari ka Kigasha mu Murenge wa Ngarama taliki ya 25 Nyakanga 2025, Umuyobozi w’Akarere ka Gatsibo Gasana Richard yasabye abana n’Urubyiruko kurangwa n’indagagaciro z’Umuco Nyarwanda babyaza umusaruro amahirwe Igihugu cyabahaye.

Muri iyi gahunda y’Intore mu biruhuko, hakorwa ubukangurambaga bunyuze mu mikino itandukanye, imbyino, imivugo n’ibindi bikorwa bifasha urubyiruko kumva ubutumwa butangwa n’inzego zitandukanye z’Ubuyobozi.