Mu cyumba cy’Inama cya Infinity Center habereye inama Nyunguranabitekerezo yateguwe ku bufatanye n’ihuriro ry’Abagide mu Rwanda igamije kuganira ku buzima bw’imyororokere no ku mbogamizi umwana w’umukobwa ahura na zo.

Umuryango w’Abagide mu Rwanda ni umuryango Nyarwanda udaharanira inyungu ufite intego yo kwita ku burere n’uburezi bw’umwana w’umukobwa. Binyuze mu mushinga wigisha ubuzima bw’imyororokere ukorera mu Mirenge ya Murambi, Kiziguro na Rwimbogo.

Bamwe mu bana b’abakobwa bahagarariye abandi mu matsinda y’uwo mushinga, bitabiriye inama nyunguranabitekerezo ku ngamba zafatwa kugirango hakumirwe ihohoterwa rishingiye ku gitsina no kurandura burundu ikibazo cy’inda ziterwa abandavu z’imburagihe.

Bimwe mu byifuzo byatanzwe n’abana b’abakobwa bahagarariye abandi muri iyi nama; basabye ubuyobozi ko hashyirwaho Inteko z’urubyiruko mu midugudu kugirango zibe umuyoboro wo gutangiramo ibyifuzo byabo ndetse no kugaragaza imbogamizi bahura na zo zishobora kwangira ubuzima bwabo n’ejo hazaza habo.

Umuyobozi w’Akarere wungirije ushinzwe imibereho myiza y’Abaturage bavuze mu rwego rwo gukorera mu ibanga, icyumba cy’urubyiruko rushobora kuboneramo serivise z’Ubuzima bw’imyororokere cyashyizwe ku kigo nderabuzima kugirango urubyiruko rwegerezwe serivise. Yanasabye abana b’abakobwa bigishijwe n’Umuryango w’Abagide mu Rwanda kuba ba mbasaderi kuri bagenzi babo.

Mu Karere ka Gatsibo mu Mirenge ya Murambi, Kiziguro na Rwimbogo habarurwa amatsinda 15 afite urubyiruko rw’abakobwa n’abahungu bagera kuri 750 bo mu bigo by’amashuri ndetse no hanze yabyo, muri uru rubyiruko, 70% ni abakobwa na 30% bakaba abahungu.