Abakozi b’Akarere ka Gatsibo basaga 150 bakorera ku rwego rw’Umurenge bahawe impanuro zigamije kunoza imikorere n’imikoreranire y’inzego hagamijwe gushyira umuturage ku isonga mu bimukorerwa.

Iyi nama yahuje abakozi b’Akarere ka Gatsibo bakorera ku rwego rw’umurenge yayobowe n’Umuyobozi w’Akarere ka Gatsibo Gasana Richard arikumwe n’abagize Komite Nyobozi y’Akarere kuri uyu wa gatandatu taliki ya 25 Nzeri 2021

Gasana Richard, Umuyobozi w’Akarere ka Gatsibo yasabye abakozi gukora inshingano zabo  za buri munsi zigakorwa neza kandi  ku gihe ndetse iyo nshingano ikazana impinduka nziza ku muturage dushinzwe kureberera umunsi ku wundi.Ati’’Mugomba gukora ibikwiye mu gihe gikwiye’’.

Abitabiriye inama basabwe gukoresha ukuri mu byo bakora bakirinda ibinyoma kuko bisubiza inyuma iterambere n’imibereho myiza y’abaturage.

Mu rwego rwo kunoza inshingano za buri mukozi, Umuyobozi w’Akarere ka Gatsibo yavuze ko buri mukozi agomba kubanza gusobanukirwa inshingano agiye gukora hagamijwe kuzana igisubizo gikwiye cy’ikibazo abaturage bafite mu rwego rwo kubazanira iterambere n’imibereho myiza.

Muri iyi nama, abakozi basobanuriwe iteka rya Prezida rigenga abakozi ba Leta, imikorere n’imikoranire y’inzego zitandukanye n’amahame y’imicungire n’imyifatire y’abakozi ba Leta.Ibi byose byari bigamije kuzamura imyumvire y’abakozi ba Leta begereye abaturage.

Nyuma y’ibiganiro bitandukanye,Rugengamanzi Steven Umunyamabanga Nshingwabikorwa w’Umurenge wa Ngarama yavuze ko nubwo rimwe na rimwe bahura n’imbogamizi mu kazi ariko zitabaherana bishakamo ibisubizo bigamije guteza imbere abaturage.