Mu gihembwe cy’ihinga cya B 2025, abahinzi bo mu Karere ka Gatsibo bahinga igihingwa cy’umuceri baritegura gusarura toni 5.8 kuri hegitari.

Mu Karere ka Gatsibo hari ibishanga bitatu bihingwamo umuceri biri mu Mirenge ya Rugarama, Gitoki, Rwimbogo, Kiziguro, Murambi, Gatsibo na Ngarama bifite ubuso bwa hegitari 1,311 zihinzeho umuceri.

Aba bahinzi bibumbiye mu makoperative ya Coproriz Ntende ihinga mu gishanga cya Ntende gifata ku Mirenge ya Rugarama, Gitoki na Rwimbogo. Koperative Corimak ifite icyicaro mu Murenge wa Kiramuruzi ihinga umuceri mu gishanga cya Kanyonyomba gikora ku Mirenge ya Kiramuruzi, Kiziguro na Murambi.

Koperative Ubumwe Gatsibo nayo ihinga umuceri mu gishanga cya Rwangingo giherereye mu Mirenge ya Gatsibo na Ngarama.

Abahinzi b’Umuceri barashimira Ubuyobozi bwabakanguriye guhinga umuceri kuko wababereye igishubizo cy’iterambere ryabo n’imiryango yabo.

Bamwe bavuga ko mbere yuko bakangurirwa guhinga igihingwa cy’umuceri, muri ibyo bishanga bahingagamo ibihingwa bitandukanye birimo: Ibijumba, imyumbati, ibigori n’ibindi ariko ntibyabafashaga mu kuzamura iterambere ry’imibereho myiza yabo.

Udahemuka Bernard, Umukozi w’Akarere ushinzwe ubuhinzi ahamya ko hari itandukaniro ry’igihe abaturage bahingaga ibihingwa bitandukanye muri ibyo bishanga ariko ubuyobozi bwaje gukangurira abaturage guhinga umuceri none ubu biteje imbere nkuko nabo babihamya.

Kugeza ubu, mu Karere ka Gatsibo mu Murenge wa Kiziguro hubatswe uruganda rutunganya umuceri n’ibiwukomokaho, rufasha abaturage bibumbiye mu ma koperative kubona isoko ry’aho umuceri wabo utunganyirizwa.