Abarokotse Jenoside yakorewe Abatutsi bahagarariye abandi mu Mirenge 14 igize Akarere ka Gatsibo bahawe amahugurwa ku isanamitima no kubaka imibanire myiza ku babahemukiye mu gihe cya Jenoside yakorewe Abatutsi.

Ni ubutumwa bwagarutsweho kuri uyu wa mbere taliki ya 15 Nzeri 2025 ubwo hakorwaga amahugurwa ku isanamitima yateguwe kubufatanye na ARCT-Ruhuka, MINUBUMWE n’Akarere ka Gatsibo.

Bamwe mu barokotse Jenoside yakorewe Abatutsi baravuga ko hakiri imbogamizi zikibangamiye ubumwe n’ubudaheranwa mu banyarwanda birimo kwishishanya hagati y’abarokotse Jenoside yakorewe Abatutsi ndetse n’abakoze icyaha cya Jenoside basoje ibihano bagasubira mu miryango yabo.

Barokotse Jenoside yakorewe Abatutsi bavuga ko babakoreye icyaha bakigenda biguruntege mu kubasanga no kubasaba imbabazi.

Ubuyobozi bw’Akarere buvuga ko buzakomeza gukora ubukangurambaga mu baturage bagize uruhare muri Jenoside yakorewe Abatutsi gusaba imbabazi abo bahemukiye, bagejejwe imbere y’ubutabera bagakora ibihano byabo ndetse ubu bakaba barasubiye mu miryango yabo.