Abayobozi batandukanye bafite mu nshingano imicungire y’abakozi mu bigo bya leta byo mu Karere ka Gatsibo  bahuguwe  ku micungire y’abakozi na Komisiyo y’Igihugu ishinzwe abakozi ba Leta.

Iyi nama yabaye kuri uyu wa gatatu taliki ya 23 Werurwe 2022, mu cyumba cy'Inama cya East Gate Hotel  yahuje Komisiyo y'Igihugu ishinzwe abakozi ba Leta n'inzego zitandukanye z'Akarere ka Gatsibo igamije kurebera hamwe imicungire y'abakozi,guteza imbere imyitwarire mbonezamurimo no gukora kinyamwuga mu nzego za Leta.

Inama yayobowe n'Umunyamabanga Nshingwabikorwa wa Komisiyo y'Igihugu ishinzwe abakozi ba Leta Madamu Angelina Muganza arikumwe na Visi Perezida w'Inama Njyanama y'Akarere ka Gatsibo n'Umuyobozi w'Akarere ka Gatsibo.

Zimwe mu ngingo zaganiriweho zirimo uburyo bwo gushaka no gucunga abakozi,guteza imbere imyitwarire mbonezamurimo no gukora kinyamwuga n’amwe mu mategeko agenga imicungire y'abakozi ba Leta.

Umunyamabanga Nshingwabikorwa wa Komisiyo y'Igihugu ishinzwe abakozi ba Leta yasabye inzego z'Ubuyobozi z’Akarere ka Gatsibo gucengezamo abakozi amatwara yo gukunda umurimo kugirango umuturage atezwe imbere binyuze mu bimukorerwa.

Umuyobozi w'Akarere ka Gatsibo Gasana Richard yashimiye inama zitandukanye bahabwa na Komisiyo y'Igihugu ishinzwe abakozi ba Leta mu micungire y'abakozi ba Leta kugirango umukozi akomeze atange umusaruro ategerejweho kandi ashyize umuturage ku isonga.

Iyi nama yitabiriwe n’Umunyamabanga Nshingwabikorwa wa Komisiyo y’Igihugu ishinzwe abakozi ba Leta n’itsinda ry’abakozi yari ayoboye,abagize Inama Njyanama y’Akarere, Komite Nyobozi y’Akarere,Abanyamabanga Nshingwabikorwa b’Imirenge,abayobozi bakuru b’ibitaro bya Kiziguro na Ngarama,abagize akanama gashinzwe gukurikirana amakosa y’abakozi mu Karere n’abayobozi b’ibigo nderabuzima 19 byo mu Karere ka Gatsibo.