Kuri uyu wa Kane taliki ya 15 Mutarama 2026, mu cyumba cy'Inama habereye inama y'Abafatanyabikorwa ba Komisiyo y'Ubukungu igamije gusuzuma ibikorwa bitandukanye by'iterambere byagezweho mu gihe cy'amezi 6 ashize y'Umwaka 2025/2026.

Iyi nama yayobowe na Ntagungira Emmanuel, Perezida wa Komisiyo y’ubukungu mu ihuriro ry’abafatanyabikorwa b’Akarere/ JADF baganira ku bikorwa by’iterambere biyemeje kugeza ku baturage b’Akarere ka Gatsibo muri uyu mwaka w’ingengo y’imari ya 2025/2026.

Mu mwaka w'ingengo y'imari wa 2025/2026, uruhare rw'Abafatanyabikorwa b'Akarere/JADF bunganiye ingengo y'imari y'Akarere n'amafaranga asaga Miriyari 6,500 Frw, muri aya hari agera kuri Miriyari 3,241,509,509 Frw azakoreshwa mu bikorwa by'ubukungu biteza imbere abaturage.

Umuyobozi w’Akarere ka Gatsibo wungirije ushinzwe iterambere ry’ubukungu Sekanyange Jean Leonard yabashimiye uruhare bagira mu guteza imbere abaturage binyuze mu gukora ibikorwa bizamura imibereho n’iterambere ry’Akarere.