Ku gicamunsi cyo kuri uyu wa Gatatu taliki ya 28 Gicurasi 2025, Umuyobozi w’Akarere ka Gatsibo Gasana Richard arikumwe n’inzego zitandukanye z’Ubuyobozi yakiriye Abadepite bo mu Nteko ishingamategeko y’uRwanda bari mu ruzinduko rw’iminsi 8 rugamije gukurikirana imikorere n’imikoranire y’inzego z’imitegekere y’Igihugu zegerejwe abaturage n’izindi nzego mu gutanga serivise ku baturage.

Ku ikubitiro, Abadepite bakoranye inama n’ibyiciro bitandukanye by’Ubuyobozi birimo: Perezida w’Inama Njyanama y’Akarere, abagize Komite Nyobozi y’Akarere, Abanyamabanga Nshingwabikorwa b’Imirenge, abayobozi b’Ibitaro bya Ngarama na Kiziguro, abayobozi b’Ibigo nderabuzima, bamwe mu bayobozi b’ibigo by’amashuri, abayobozi b’amashami ku rwego rw’Akarere, abayobozi bahagarariye WASAC na REG mu Karere n’inzego z’Umutekano.

Mu ishusho rusange ry’Akarere, Umuyobozi w’Akarere Gasana Richard yagaragarije abadepite ko abaturage babona amazi meza bagera ku ijanisha rya 87%, umuriro w’amashanyarazi 63.9% ndetse n’abaturage bafite telefoni bagera ku ijanisha rya 82.6%.

Depite Nyirabazayire Angelique na Depite Izere Igrid Marie Parfaite bashimiye Ubuyobozi bw’Akarere ka Gatsibo n’inzego bafatanya ku mbaraga bashyira muri gahunda zitandukanye zigamije guteza imbere umuturage.

Mu ruzinduko rw’Abadepite batangiye gukorera mu Karere ka Gatsibo, kuva kuri uyu wa Gatatu taliki ya 28 Gicurasi kugeza taliki 4 Kamena 2025 bazasura abaturage hirya no hino mu Mirenge 8 kuri 14 igize Akarere ka Gatsibo.

Hashingiye ku ibarura rusange ryakozwe muri 2022, ryagaragaje ko Akarere ka Gatsibo gatuwe n’abaturage ibihumbi 551,164 barimo abagore 286,703 n’abagabo 264,461 batuye mu ngo 136,200.