Abadepite bagize inteko ishingamategeko y’uRwanda batangiye gusura uturere  bagamije kuganira n’Ubuyobozi bw’Akarere ku iterambere n’imibereho myiza y’abaturage,harebwa ibibazo abaturage bafite no kubikorera ubuvugizi

Abadepite baje mu karere ka Gatsibo bayobowe na Depite Uwera Kayumba Marie Alice,arikumwe na Depite Bitunguramye Diogene na Depite Uwanyirigira Gloriose bose bazamara iminsi 14 mu Karere ka Gatsibo basura abaturage mu mirenge itandukanye hamwe n’imishinga yagenewe abaturage.

Depite Uwera Kayumba Marie Alice yavuze ko urugendo rwabo mu Karere ka Gatsibo rugamije kureba imibereho y’abaturage hanasuzumwa ishyirwa mu bikorwa ry’imishinga y’iterambere nicyo imaze kugeza ku baturage.

Gasaba Richard,Umuyobozi w’Akarere ka Gatsibo yagaragarije Abadepite ishusho y’Akarere aho yagarutse ku mishanga itandukanye imaze kugezwa ku baturage irimo imiyoboro y’amazi imaze kubakwa mu karere ikaba iha abaturage amazi meza ku kigereranyo cya 74%,hakozwe imihanda itandukanye,ibishushanyo mbonera by’imijyi byarakozwe,hatanzwe amashanyarazi ku baturage,ibyumba by’amashuri byubatswe n’ibindi.

Yagaragaje ko mu rwego rwo guha icyubahiro abazize Jenoside yakorewe abatutsi mu Rwanda,hubatswe urwibutso rwa Jenoside yakorewe abatutsi mu murenge wa Kiziguro ubu rushyinguyemo mu cyubahiro imibiri y’abatutsi igera ku bihumbi 20,109.

Umutwe wAbadepite nkurwego ruhagarariye abaturage, mu kurangiza neza inshingano zarwo ruhora rushishikajwe no gukurikirana uko gahunda zashyiriweho guteza imbere abaturage no kubavana mu bukene zishyirwa mu bikorwa.

Ni muri urwo rwego abagize Inteko Ishinga Amategeko, Umutwe wAbadepite basura abaturage aho batuye kugira ngo bamenye ibibakorerwa nuruhare babigiramo, bamenye n’ibibazo bahura nabyo kugirango bishakirwe ibisubizo.