Abadepite bagize Komisiyo y’Imibereho y’Abaturage mu Nteko ishingamategeko y’uRwanda basuye Akarere ka Gatsibo bari mu gikorwa kigamije kugenzura uko gahunda zo kurwanya ikibazo cy’imirire mibi n’igwingira zishyirwa mu bikorwa, imbogamizi zikigaragara n’ingamba Akarere kafashe zo kurandura burundu iki kibazo.

Ni igikorwa cyatangiye kuri uyu wa Gatatu taliki ya 7 Gicurasi 2025, aho ku ikubitiro Abadepite baganiriye n’ibyiciro bitandukanye by’Ubuyobozi bw’Akarere, abafatanyabikorwa bako n’inzego z’Umutekano.

Ubuyobozi bw’Akarere bwagaragaje ishusho rusange y’uburyo ikibazo cy’imirire mibi n’igwingira ry’abana bato cyafatiwe ingamba zo ku kirandura burundu.

Mu Karere ka Gatsibo habarurwa ingo mbonezamikurire z’abana bato zigera ku 1,622 zirimo izikorera mu ngo 1,415, mu bigo by’amashuri 39, izikorera mu baturage zigera kuri 167 n’ imwe y’icyitegererezo. Izi ngo mbonezamikurire z’abana bato zifite abarezi bagera ku 3,256 mu Karere kose. Ubwitabire bw’amarerero mu Karere ka Gatsibo ni ibihumbi 58,182/58,255 bifite ijanisha rya 99,4%.

Depite Ndoriyobijya Emmanuel na Depite Uwababyeyi Jeannette barikumwe n’Umuyobozi w’Akarere wungirije ushinzwe imibereho myiza y’abaturage basuye amarerero 2 yo mu Murenge wa Rwimbogo berekwa uburyo abana bato bitabwaho bahabwa ubumenyi bw’ibanze bukangura ubwonko bwabo, kandi basuye ikigo nderabuzima cya Rwimbogo.

Rutagarama James, Umuyobozi w’Ikigo Nderabuzima cya Rwimbogo yagaragaje uburyo iki kigo gitanga serivise z’ubuvuzi ku baturage no kwita ku bana baba bahuye n’ikibazo cy’imirire mibi n’igwingira.

Mu mpera z’ukwezi kwa Mata 2025, Ikigo nderabuzima cya Rwimbogo cyakiriye abaturage bakigannye bagera 3,793 kuri 4,129 byari biteganyijwe bingana na 92%.

Biteganyijwe ko, uruzinduko rw’Abadepite bagize Komisiyo y’Imibereho y’Abaturage ruzamara iminsi 2 kuva taliki ya 7-8 Gicurasi 2025 basura ibikorwa bitandukanye bigamije gukemura ikibazo cy’imirire mibi n’igwingira.