Abadepite ba Komisiyo y’Uburezi, ikoranabuhanga, umuco, siporo bo mu nteko ishingamategeko y’uRwanda basuye Akarere bagamije gusesengura ishyirwa mu bikorwa rya Politike ya siporo yo muri 2020-2030.

Ku ikubitiro, Abadepite baganiriye n’Ubuyobozi bw’Akarere n’abafatanyabikorwa muri siporo hagamijwe kumenya iterambere rya siporo mu Karere ka Gatsibo.

Politike y’Iterambere rya siporo 2020-2030, ifite intego rusange yo gushyiraho uburyo bwo guteza imbere siporo y’umwuga, iterambere rya siporo na siporo kuri bose.

Siporo kuri bose ni gahunda ifasha abaturage mu ngeri zinyuranye gukora siporo hanarwanya by’umwihariko indwara zitandura mu bantu bakuru ariko bikajyana n’intego ya politike igamije guteza imbere siporo muri 2020/2030.

Gahunda y’isonga yatangiye mu mwaka wa 2010 hajyaho Isonga Football Academy, mu mwaka wa 2020 hashyizweho ibigo by’ikitegererezo (Center of Excellence), mu rwego rwo kuzamura impano mu bana bato babanyeshuri. Mu Karere ka Gatsibo iyi gahunda yatangirijwe mu bigo 2 aribyo: Kiziguro Secondary School na College ADEGI Gituza mu mikino ya Basktball na Handball.

Muri ishuri ryisumbuye rya Kiziguro Secondary school hubatswe ikibuga cy’umukino wa Handball; hakoreshejwe amafaranga angana miliyoni cumi n’imwe (11,000,000 Frw) z’amafaranga y’uRwanda mu rwego rwo gufasha abana kwidagadura. Hubatswe kandi ibibuga by’imikino bya basketball na Handball mu ishuri ryisumbuye rya ADEGI Gituza riherereye mu Murenge wa Kageyo hakoreshejwe amafaranga angana na Miriyoni 47,000,000 z’amafaranga y’uRwanda.

Ubuyobozi bw’Akarere bwagaragarije abadepite ishusho ya siporo mu Karere ka Gatsibo n’uburyo hafashwe ingamba zo guteza imbere siporo haba mu bigo by’amashuri ndetse no mu baturage muri rusange.