Itsinda ry’Abadepite bagize Komisiyo y’Ubumwe bw’Abanyarwanda, uburenganzira bwa muntu no kurwanya Jenoside riyobowe na Depite Uwiringiyimana Philbert ari kumwe na Depite Izere Ingride Marie Parfaite basuye Akarere ka Gatsibo baganira n’Ibyiciro bitandukanye birimo Ubuyobozi bw’Akarere, ihuriro ry’imiryango ishingiye ku myemerere, Ibuka, Avega n’inzego z’Umutekano.

Uruzinduko rw’Intumwa za rubanda rwari rugamije gusesengura ishyirwa mu bikorwa rya Politiki y’Igihugu y’Ubumwe n’Ubwiyunge y’Umwaka wa 2020.

Mu ishusho rusange y’Akarere ka Gatsibo, hagaragajwe ko Ubumwe n’ubwiyunge mu Karere buhagaze neza kandi ubukangurambaga bugikomeje.

Hagaragajwe ko mu rwego mu rwego rwo gusubiza mu buzima busanzwe abafunguwe bari barafungiwe icyaha cya Jenoside babaruwe hakurikijwe Umurenge mu rwego rwo kubategura ndetse no kuganira n’imiryango yabo yabakiriye. Mu Karere ka Gatsibo hari abafunguwe bagera kuri 731 barimo abagabo 697 n’abagore 34.

Depite Uwiringiyimana Philbert yavuze ko Ubumwe bw’Abanyarwanda arizo mbaraga zacu’’. Yasabye abayobozi mu nzego zitandukanye gukomeza gushishikariza abaturage kuba umwe mu rwego rwo kwirinda icyakongera gucamo abanyarwanda ibice.