Abana 18 bahagarariye abandi mu ihuriro n’amatsinda ry’abana baturutse mu Mirenge 14 igize Akarere ka Gatsibo, bahuriye mu kiganiro cyabahuje n’inzego zitandukanye hagamijwe kurebera hamwe uko uburenganzira bw’umwana bubungabunzwe no gukorera ubuvugizi ibibazo byugarije abana hagamijwe kubibonera ibisubizo k’ubufatanye n’inzego z’ubuyobozi zibengereye.

Kuri uyu wa gatanu taliki ya 20 Mata 2018 Akarere ka Gatsibo kubufatanye n’Umufatanyabikorwa wako Children Voice Today( umuryango nyarwanda) ufite mu nshingano kurengera  uburenganzira bw’umwana ubinyujije mu mushinga  witwa ‘’Right to Protection and Participation’’ hateguwe inama igamije kuva ibibazo abana bafite binyujijwe mu ihuriro n’amatsinda y’abana baturutse mu mirenge 14  y’Akarere ka Gatsibo.

Murekatete Matilda,Umukozi w’Umushinga ‘’right to protection and participation’’ yavuze ko amatsinda y’abana mu Mirenge 14 igize Akarere ka Gatsibo akorera ubuvugizi abana bahohoterwa bagakoreshwa imirimo y’ingufu ndetse bakanakangurira bagenzi babo bataye ishuri kurisubirimo.

Cyurinyana Sifa w‘ imyaka 16 wo mu Murenge wa Rwimbogo avuga ko mu itsinda ry’abana yahamenyeye uburenganzira bwe ndetse anamenya uko yafasha abandi bana cyane cyane abafite ibibazo byihariye birimo n’ibiterwa n’amakimbirane y’ababyeyi babo.

Muhorakeye Scovia ni umwe mu bana bagize komite y’ihuriro ry’abana ku rwego rw’Akarere ka Gatsibo yemeza ko amatsinda y’abana yabereye igisubizo ibibazo by’abana bahura nabyo mu miryango yabo ariko iyo bikorewe ubuvugizi bibonerwa ibisubizo.

Umukozi w’Akarere ka Gatsibo ashinzwe uburenganzire n’iterambere ry’umuryango madamu  Mukagasana Naomey yahamije ko ibikorwa by’abana ari bimwe mu bituma ibibazo bitandukanye bibonerwa ibisubizo mu Miryango yabo ndetse n’abaturanyi babo.

Kugeza ubu mu Karere ka Gatsibo  habarurwa  amatsinda y’abana 14 agizwe  n’abana 822 akora ubuvugizi bw’Abana bafite ibibzo kandi bikabonerwa ibisubizo kubufatanye n’Ubuyobozi bwite bwa leta.