Abayobozi b’Amadini n’amatorero akorera mu Karere ka Gatsibo kubufatanye n’Akarere biyemeje gukemura ibibazo bibangamiye imibereho myiza y’ abaturage bitarenze ukwezi kwa 12/2022.

Ibi babivuze kuri uyu wa Gatatu taliki ya 28 Nzeri 2022 mu nama nyunguranabitekerezo yabahuje n’Ubuyobozi bw'Akarere igamije kurebera hamwe uko hakemurwa ibibazo bibangamiye imibereho myiza y’abaturage, ubukangurambaga kuri gahunda ya Ejoheza no kwishyurira abaturage batishoboye umusanzu w’ubwisungane mu kwivuza.

Iyi nama yayobowe n'Umuyobozi w'Akarere ka Gatsibo Gasana Richard   initabirwa n'Umuyobozi w'Akarere wungirije ushinzwe imibereho myiza y'abaturage Mukamana Marceline, Umuyobozi w’Inkeragutabara, Umuyobozi wa Polisi mu Karere n'Abanyamabanga Nshingwabikorwa b'Imirenge.

Zimwe mu ngingo zaganiriweho muri iyi nama zirimo: Kurebera hamwe ishusho y'ibibazo bibangamiye imibereho myiza y'abaturage no kubishakira ibisubizo, gahunda ya EJOHEZA n'ishusho y'ubwitabire bw'abaturage mu gutanga ubwisungane mu kwivuza n’Ubukangurambaga kuri gahunda ya Gatsibo igwije imbuto.

Imwe mu myanzuro yafatiwe muri iyi nama:

Abayobozi b'amadini n'amatorero biyemeje gufatanya n'Akarere mu kubaka amazu y’abaturage batishoboye 94 , gusana amazu 173 , kubaka ubwiherero 108 , gusana ubwiherero 714 , gutanga ubwisungane mu kwivuza ku bantu 9,430 no gukangurira abaturage kujya muri gahunda ya EJOHEZA ,byose bikazarangira gukorwa bitarenze tariki 30/12/2022.

Abitabiriye inama biyemeje gukoresha neza imbaraga z'abafatanyabikorwa bose bakorera ku rwego rw'Umurenge, kunoza imikoranire, gutanga servise zinoze, kwegera abaturage no kubakoraho ubukangurambaga bugamije kubafasha guhindura imyumvire no kugira uruhare mu bibakorerwa;

Muri gahunda y'Akarere yiswe "Gatsibo igwije imbuto", Abayobozi b'amadini n'amatorero biyemeje ko buri rusengero n'imisigiti bazatera ibiti by'imbuto ziribwa nibura hagati y'ibiti 30-50 ku busitani bw'aho bakorera, iki gikorwa kikazatangizwa ku rwego rw'Akarere tariki 22/10/2022. Muri iyi gahunda kandi, buri rwego rw'Ubuyobozi, ibigo by'abikorera n'ibigo bya Leta bizatera ibiti by'imbuto ziribwa aho bikorera, ibi kandi bikazaterwa no ku mihanda minini.