Akarere ka Gatsibo kaje ku mwanya wa 3 n’amanota 86.2% mu bikorwa by’urugerero rw’Inkomezabigwi icyiciro cya 12 ku rwego rw’Igihugu no ku mwanya wa 1 mu Ntara y’Iburasirazuba. Ni amakuru yatangajwe na Minisiteri y’Ubumwe bw’Abanyarwanda n’Inshingano Mboneragihugu /MINUBUMWE kuri uyu wa gatanu.

Urugerero rw’Inkomezabigwi icyiciro cya 12 rwatangiye taliki ya 13 Mutarama rugeza  28 Gashyantare 2025.

Mu Karere ka Gatsibo, Intore 1,849 nizo zasoje urugerero rw’inkomezabigwi icyiciro cya 12 zirimo abakobwa 899 n’abahungu 950. Uru rugerero rwari rufite  insanganyamatsiko igira aiti: ‘’ Duhamye umuco w’ubutore, ku rugerero rwo kwigira’’.

Asaba Frank, ni Umuyobozi w’ishuri ryisumbuye rya ES Gasange ahamya ko ibikorwa intore zakoze ku rugerero bifite icyo bivuze ku igabanuka ry’imikoreshereze y’ingengo y’imari ku bigo by’amashuri. Ati: ‘’ Intore zari ku rugerero rw’inkomezabigwi icyiciro cya 12 zakoze ibikorwa bitandukanye birimo gukora amasabune adufasha kunoza isuku ku ishuri ndetse bubatse imirima y’igikoni myinshi iteweho imboga twajyaga tugura mu isoko kugirango tugaburire abana indyo yuzuye, none ubu izi mboga nizera mu minsi micye iri imbere ingengo y’imari twakoreshaga izagabanuka’’.

Ibikorwa bitandukanye byakozwe n’Intore zari ku urugerero rw’inkomezabigwi icyiciro cya 12 mu Karere ka Gatsibo byari bifite agaciro gasaga miriyoni 590 z’amafaranga y’u Rwanda.

Uturere 5 twa mbere twahize utundi mu bikorwa by’urugerero rw’Inkomezabigwi icyiciro cya 12 twahembwe  ni: Akarere ka Kamonyi 87.3%, Nyaruguru 86.2%, Gatsibo 86.2%, Ruhango 85.7% na Ngororero 83.8%.