Hashize amazi agera kuri icyenda indwara y’amatungo y’uburenge yibasiye uturere twa Gatsibo, Nyagatare na Kayonza, aho aborozi bari batakigurisha amatungo yabo mu isoko ry’inka (igikomera).

 Kuva mu kwezi kwa gatanu kugeza mu kwa cumi n’abiri 2017 uturere twa Kayonza, Gatsibo na Nyagatare twagaragawemo indwara y’uburenge hafatwa icyemezo cyo kutazerereza amatungo.

Kuri uyu wa 22 Mutarama 2018,mu cyumba cy’inama cya hotel y’Akarere ka Gatsibo aborozi bagera ku ijana (100) bari bahagarariye bandi bagiranye inama na Minisitiri w’ubuhinzi n’ubworozi arikumwe na Guverineri w’Intara y’Iburasirazuba,abayobozi b’Uturere twa Gatsibo,Kayonza na Nyagatare n’inzego z’umutekano.

Minisitiri w’Ubuhinzi n’Ubworozi Dr Geraldine Mukeshimana yabwiye aborozi bagera ku 100 baturutse mu turere twa Kayonza, Gatsibo na Nyagatare bahagarariye abandi ko bakomorewe ku masoko y’amatungo,abasaba gutwara ubwo butumwa kubo baje bahagarariye.

Guverneri w’Intara y’Iburasirazuba Mufulukye Fred yashimye aborozi babashije gutunganya inzuri kugera ku rugero rwiza,uyu muyobozi yabasabye gukomeza korora kinyamwuga kugirango babyaze umusaruro ubworozi bakora.

Munyaburanga Emmanuel wororera mu murenge wa Rwimbogo mu karere ka Gatsibo yasabye Minisitiri w’ubuhinzi n’ubworozi ko bafite imbogamizi zo kutabona imbuto y’ubwatsi ku gihe bigatuma bahura n’imbogamizi.

Madamu Minisitiri Mukeshimana yijeje aborozi ko imbogamizi bafite mu bworozi bwabo bagiye gushaka ibisubizi, abasaba kujya bamenyekanisha ibibazo bafite kugirango bibonerwe ibisubizo.