Abayobozi mu nzego zitandukanye z’Ubuyobozi mu Karere ka Gatsibo basabwe kunoza serivise batanga no kwirinda ruswa n’akarengane mu nshingano bafite z’aho bakorera

Ni ubutumwa bwahawe abayobozi kuva ku rwego rw’Umudugudu, Utugari, Imirenge kugeza ku Karere basaga 700 bari bitabiriye Inama Mpuzabikorwa y’Akarere yabaye kuri uyu wa Kane taliki ya 8 Kamena 2023 yari ifite insanganyamatsiko igira iti ‘’ Ku Mudugudu, Kurengera Umwana mu biganza byacu twese’’.

Umunyamabanga wa Leta muri Minisiteri y’Ubutabera Amb. Solina Nyirahabimana yasabye abayobozi mu nzego zitandukanye kunoza serivise baha abaturage ndetse bakirinda ruswa n’Akarengane.

Sekanyange Jean Leonard, Umuyobozi w’Akarere wungurije ushinzwe iterambere ry’Ubukungu yagarutse ku ntego y’Inama Mpuzabikorwa y’Akarere ko iba igamije kugaragaza ibyagezweho, gusuzuma imbogamizi ziba zaragaragaye no kuzifatira ingamba.

Muri iyi nama, hatangijwe ubukangurambaga bwo kurengera umwana bushingiye ku matsinda (clubs) yubakiye ku Mudugudu, biteganyijwe ko hazakorwa amatsinda 602 mu Karere kose, hagaragajwe ishyirwa mu bikorwa ry’imihigo y’inzego zegerejwe abaturage ku rwego rw’Umurenge, Akagari n’Umudugudu.

Umurenge wa Gitoki niwo wahize iyindi mu ishyirwa mu bikorwa ry’imihigo yegerejwe abaturage, Utugari 3 turimo Rwikiniro yo mu Murenge wa Rwimbogo niko kaje ku isonga, Marimba ko mu Murenge wa Kabarore na Gihuta mu Murenge wa Rugarama.

Mu midugudu 602 igize Akarere ka Gatsibo, imidugudu 3 niyo yahize iyindi irimo Umudugudu wa Bwiza wo mu murenge wa Gitoki, Abanyangeyo wo mu murenge wa Remera n’Umudugudu wa Kinunga wo mu murenge wa Rwimbogo.