Abayobozi bahagarariye abandi kuva ku rwego rw’umudugudu kugeza ku Karere bitabiriye inama mpuzabikorwa y’Akarere bagaragarijwe ubuzima bw’Akarere uko buhagaze burimo iterambere n’imibereho myiza y’Abaturage.

Iyi nama yari iyobowe na Guverineri w’Intara y’Iburasirazuba CG Emmanuel K Gasana arikumwe  n’abagize inama y’umutekano itaguye ku rwego rw’Intara,iyi nama yari ifite insanganyamatsiko igiriti’’Tujyanemo twese mu mihigo,twimakaza imiyoborere ishingiye ku muturage’’.

Umuyobozi w’Akarere ka Gatsibo Gasana Richard yagaragarije abitabiriye inama mpuzabikorwa bimwe mu bikorwa byakozwe mu gihe cy’imyaka itanu ishize kuva 2016-2021,incamake y’imihigo y’Akarere y’umwaka w’ingengo y’imari 2021-2022,aho akarere kageze ku rugamba rwo kurwanya Covid 19 n’uko Akarere gahagaze mu bwisungane mu kwivuza,Ejoheza,ibibazo bibangamiye imibereho myiza y’abaturage n’imanza za gacaca.

Mu myaka itanu ishize,Akarere ka Gatsibo kabonaga umusaruro w’ ibigori toni 3.5 kuri hegitari bigaragarako muri 2020/2021 habonetse toni 4.8 kuri hegitari,igihingwa cy’umuceri muri 2015-2016 hasarurwaga toni 5 kuri hegitari naho muri 2020/2021 hasaruwe toni 5.7 kuri hegitari.

Gasana Richard,Umuyobozi w’Akarere ka Gatsibo yagaragaje ko mu mwaka w’ingengo y’imari ya 2021/2022 akarere ka Gatsibo kahize imihigo 100 arimo 29 y’ubukungu,55 mu mibereho myiza na 16 yo mu miyoborere myiza n’ubutabera ikazatwara ingengo y’imari isaga miriyari 27 na miriyoni 500 z’amafaranga y’uRwanda.

Guverineri w’Intara y’Iburasirazuba CG Emmanuel K Gasana yasabye ibyiciro bitandukanye by’abayobozi mu nzego z’ibanze, abafatanyabikorwa n’inzego z’umutekano kwimakaza indangagaciro,kunoza imikorere n’imikoranire y’inzego n’abaturage no gukorera ku mihigo kuko bizana impinduka ku buzima bw’abaturage.

Muhorana Edward, Umuyobozi w’abafatanyabikorwa b’Akarere ka Gatsibo yavuze ko abazakomeza gufatanya n’Akarere mu rwego rwo gukomeza kuzamura iteramberen’imibereho myiza y’abaturage.