Mu Karere ka Gatsibo hatangijwe icyumweru cyahariwe ubukangurambaga ku mitangire myiza ya serivise (Service delivery Campaign week) hagamijwe gukomeza kwibutsa inzego zitandukanye zirimo iza Leta n’abikorera gushyira umuturage ku isonga.

Ubu bukangurambaga bwatangijwe kuri uyu wa mbere taliki ya 7 Gashyantare 2022 bukazasozwa ku wa gatandatu taliki ya 13 Gashyantare 2022.

Atangiza ubu bukangurambaga mu karere ka Gatsibo, Sekanyange Jean Leonard Umuyobozi w’Akarere ka Gatsibo wungirije ushinzwe iterambere ry’ubukungu yasabye inzego zitandukanye gushyira umuturage ku isonga mubyo bakora byose.

Ubukangurambaga ku mitangire ya serivise buzamara iminsi irindwi kuva taliki ya 7 kugeza kuri 13 Gashyantare 2022 bufite insanganyamatsiko igira iti’’Kwakira neza abatugana na yombi, Umuturage ku isonga’’.

Muri ubu bukangurambaga bwahariwe imitangire ya serivise nziza, Ubuyobozi bw’Akarere ka Gatsibo bwagenzuye ku nyubako za leta ibishobora gufasha abaturage kubona serivise yihuse no gutanga ibitekerezo ku kunoza serivise binyuze mu dusanduka tw’ibitekerezo.

Mukamana Marceline, Umuyobozi w’Akarere ka Gatsibo wungirije ushinzwe imibereho myiza y’abaturage ubwo yasuraga umurenge wa Ngarama mu rwego rwo kugenzura imitangire myiza ya serivise ku baturage yasuye ibiro bitanga serivise z’ubutaka, irangamimerere n’imiyoborere myiza.

Umunyamabanga Nshingwabikorwa w’Umurenge wa Ngarama Rugengamanzi Steven yavuze ko ibikorwa bitandukanye bikorwa bishingiye ku muturage, hakirwa ibibazo bafite ndetse no kubishakira ibisubizo no kwandika abana bavutse mu bitabo by’irangamimerere no kwandukura abantu bitabye Imana muri ibyo bitabo.

Biteganyijwe ko icyumweru cyahariwe ubukangurambaga ku mitangire ya serivise kizasigira abantu batanga serivise kurushaho kuzinoza no gushyira umuturage ku isonga mu bimukorerwa.