Guverineri w’Intara y’Iburasirazuba CG Emmanuel Gasana yakanguriye abagore kugana ibigo by’imari kugirango bibafashe kubona inguzanyo mu rwego rwo kwihutisha iterambere mu muryango

Ibi yabigarutseho kuri uyu wa gatandatu taliki ya 15 Ukwakira 2022 ubwo hizihizwaga umunsi mpuzamahanga w’umugore wo mucyaro wari ufite insanganyamatsiko igira iti ‘’ Iterambere ry’Umugore wo mucyaro, inking y’ubukungu bw’Igihugu’’.

Uyu munsi wizihirijwe mu mirenge 14 igize Akarere ka Gatsibo aho ku rwego rw’Akarere wizihirijwe mu murenge wa Ngarama mu Kagari ka Kigasha ku ishuri ryisumbuye rya Bushyanguhe.

Kuri uyu munsi wo kwizihiza umunsi mpuzamahanga w’umugore wo mucyaro, haremewe imiryango 2 itishoboye yahawe inka, igishoro ku nkunga ya VUP yahawe itsinda riboha agaseke rigizwe n’abagore 14 aho bahawe ibihumbi 140 by’amafaranga y’uRwanda

Bayihorere Anasitaziya wo mu Kagari ka Bugamba na Kikabahenda Alvera wo mu kagari ka Kigasha mu murenge wa Ngarama barirahira Umukuru w’Igihugu wabagabiye inka bakaba bagiye kunywa amata, kubona ifumbire n’irindi terambere rituruka ku bworozi bw’inka.

Bati ‘’ Turashimira Umukuru w’Igihugu watugabiye inka ubu iterambere ryacu rigiye kwihuta kubera kubona amata n’ifumbire tuzahabwa n’inka tworojwe’’.

Mu bindi bikorwa byakozwe ku munsi wo kwizihiza umunsi mpuzamahanga w’umugore wo mucyaro mu karere ka Gatsibo, hatewe ibiti by’imbuto ziribwa mu kigo cy’ishuri cya GS Bushyanguhe giherereye mu murenge wa Ngarama,hatangwa ibigega bifata amazi n’ibiryamirwa ku miryango itishoboye.

Ingabire Chantal, Umuhuzabikorwa w’Inama y’Igihugu y’abagore wungirije ku rwego rw’Igihugu yashimiye Leta y’ubumwe yasubije umugore ijambo ubu akaba agira uruhare mu iterambere ry’umuryango n’Igihugu binyuze mu kwishyira hamwe mu matsinda,kugana amabanki n’uruhare w’umugore ku gukemura amakimbirane mu miryango.