Inama y’Igihugu y’abagore kuva ku rwego rw’Akagari, imirenge n’Akarere bahawe umukoro wo kurandura burundu ibibazo bikigaragara mu miryango birimo amakimbirine ku bashakanye, kunoza isuku n’imirire mibi ku bana bari munsi y’imyaka itanu.

Ibi babisabwe n’Umuyobozi w’Akarere ka Gatsibo Gasana Richard kuri uyu wa kane taliki ya 24 Gicurasi 2018 mu nteko rusange y’abagaore, yari igamije kurebera hamwe ibikorwa bimaze kugerwaho ndetse hanagaragazwa igenamigambi ry’umwaka wa 2018/2019.

Umuyobozi w’Akarere yavuze ko abagore bageze kuri byinshi biri mu iterambere ry’Akarere ndetse ko bafite n’umukoro wo gukomeza gukemura ibibazo bikiboneka mu miryango hagashakwa n’icyarushaho guteza imbere umuryango.

Mukamwiza Elvanie,Umuhuzabikorwa w’Inama y’igihugu y’abagore mu karere ka Gatsibo yavuze ko mu ngengo y’imari 2017/2018 ,abagize inama y’Igihugu y’abagore kuva ku rwego rw’Akagari kugeza ku Karere bakoze ibikorwa bitandukanye birimo gutanga isakaro y’ubwiherero 104,gukora uturima tw’igikoni 1,120 n’ibindi bikorwa byateje imibereho myiza y’abaturage byatwaye ingengo y’imari isaga miliyoni enye z’amafaranya y’u Rwanda.

Abari mu nteko rusange y’abagore biyemeje kurwanya inda zidateganyijwe,isuku nke ikirangwa mu miryango,gukangurira ababana mu buryo butemwe n’amategeko gusezerana mu mategeko ndetse no kwandikisha abana bakivuka mu bitabo by’irangamimerere.