Abanyeshuri bagera ku 1,571 ba GS Kibondo riherereye mu kagari ka simbwa mu murenge wa Kabarore mu karere ka Gatsibo basabwe kwirinda abantu babashuka bifuza kwangiza ubuzima bwabo bw’ejo hazaza.

Ibi byavuzwe n’itsinda ry'abadepite bari mu ihuriro ry'abanyarwandakazi bari mu nteko ishingamategeko(FFRP) basuye ikigo cy'amashuri cya GS Kibondo giherereye mu Kagari ka simbwa, Umurenge wa Kabarore mu Karere ka Gatsibo.

Uruzinduko rw'abadepite mu karere ka Gatsibo rwari rugamije gukangurira urubyiruko rw'abanyeshuri kwirinda ihohoterwa rishingiye ku gitsina iryari ryo ryose no kurwanya ruswa.

Depite Uwimanimpaye Jean d'Arc yasabye abanyeshuri b’urwunge rw’amashuri rwa Kibondo mu murenge wa kabarore kujya batanga amakuru mu gihe babonye ahakekwa ikibazo cya ruswa n’ihohotera rishingiye ku gitsina.

Mu kiganiro yagiranye n’ibyiciro bitandukanye by’abanyeshuri ba GS Kibondo,Imaniriho Clarrise Umudepite mu nteko ishingamategeko y’u Rwanda yabakanguriye kwiga bafite intego ko ariyo ntwaro ikomeye y’ubuzima bwabo bw’ejo hazaza.

Umuyobozi w'Akarere wungirije ushinzwe imibereho myiza y'abaturage Kantengwa Mary yasabye urubyiruko rw'abanyeshuri rwa GS Kibondo rugera ku 1,571 ati’’Buri mwana wese agomba kwiga afite intego y’ejo hazaza kuko arimwe bayobozi b’ejo mu nzego zitandukanye z’Igihugu cyacu’’.

Bamwe mu banyeshuri ba GS Kibondo bavuze ko kugirango birinde ihohoterwa rishingiye ku gitsina na ruswa nuko bagomba kwirinda kunywa ibiyobyabwenge,kugira intego y’ubuzima bwabo no kunyurwa n’ibyo ababyeyi babo babaha no kubumvira.