Mu rwego rwo kunoza igenamigambi ry’ibikorwa bizakorerwa abaturage mu mwaka w’ingengo y’imari 2018/2019, Akarere ka Gatsibo n’abafatanyabikorwa bako bahuriye mu nama y’umunsi umwe kuri uyu wa gatanu taliki ya 6 Nyakanga 2018 hagamijwe guhuriza hamwe igenamigambi.

Gasana Richard, Umuyobozi w’Akarere ka Gatsibo yashimye abafatanyabikorwa b’Akarere uruhare rwabo mu iterambere n’imibereho myiza y’abaturage.Yavuze ko abafatanyabikorwa bafite uruhare runini mu ntego z’Akarere gafite ndetse n’imihigo ya buri mwaka Akarere gahiga kuzageza ku baturage.

Atangiza inama y’afabafatanyabikorwa bahuriyemo n’Ubuyobozi bw’Akarere ka Gatsibo, Madamu Mary Barikungeri Umuyobozi w’abafatanyabikorwa/JADF mu karere yavuze ko bazakomeza gufatanya n’Ubuyobozi bw’Akarere mu bikorwa bitandukanye birimo iby’ubukungu, imibereho myiza, imiyoborere myiza n’ubutabera bagamije guteza imbere abaturage.

Mu rwego rwo kunoza igenamigambi rihuriweho (Joint Planning) n’Akarere n’abafatanyabikorwa bako, abari mu nama baganiririye mu matsinda bakoreramo kugirango bahurize hamwe ibikorwa ndetse hagaragajwe abagenerwabikorwa naho bazakorera.

Abari muri iyi nama bagarutse ku bibazo bikibangamiye imibereho myiza y’abaturage(human security issues) birimo imirire mibi,umwanda,abana bata ishuri n’ibindi biyemeza ubufatanye kugira ngo ibi bibazo birandurwe burundu mu baturage.

Umuyobozi w’Akarere ka Gatsibo yasabye abafatanyabikorwa b’Akarere kwibanda cyane mu gufasha abaturage bahuye n’ibiza babonerwa icumbi ndetse hakomeza kubakwa ibyumba by’amashuri kugirango hagabanwe ita ry’amashuri rya hato na hato ry’abana.